RAKYATMALUKU.FAJAR.CO.ID — AMBON, —Paleng rame orang carita kalo pemerinta nih dong mau kasnae harga BBM bersubsidi. Skang Pertalite dan Solar yang biasa orang kacil pake akang jadi mahal suda.
Onco, sopir oto Kabong Cengke bilang, kalo sampe ptralite deng solar akang pung harga nae, deng su seng bisa bilang lae deng akang dunia Indonesia ini.
”Sio eee oras ini saja katong su stenga mati. Harga barang su tinggi. Kalao BBM nae lae kombali bararti ancor sudah,” kata Onco for Rakyat Maluku, kamareng.
Onco yanh lulusan Ekonomi Unpatti ini bilang dia pastikan kalao Pertalite nae jadi Rp10.000 per liter, pasti inflasi jua nae tinggi.
”Akang inflasi bisa sampe 0,97 persen. Lalu ini akang bahaya deng kondisi rakyat yang ada tarpuruk tagal panyaki Covid-19 ini,” Onco Bakanor.
Tagal itu, Onco harap for pemerta supaya sadiki cermat jua, jang bebani rakyat dalang kondisi kaya bagini.
”Pemerinta pasti bisa cari deng gali sumber pendapatan negara laeng for tutu kemungkinan terjadinya kebocoran anggaran terhadap APBN pada setiap belanja dan transfer ke daerah,” saran dia.
Dia jua bilang, PDI-P yang sakarang berkuasa musti inga-inga hati lae. Barang dolo di waktu presiden SBY berkuasa, BBM nae sadiki saja PDI-P yang pasang dada par protes akang, sampe-sampa Ibu Megawati kaskaluar air mata.
”Yah, PDI-P itu kan katong kanal deng partai wong cilik atau orang-orang kacil. Semoga dong seng kastengamati orang kacil kaya katong ini jua,” kata dia deng muka kasiang. (MON)
