RAKYATMALUKU.FAJAR.CO.ID — AMBON, — Ini macet su paleng parah. Tiap hari, mulai par pagi su macet. Akang mulai macet kombali pas sore.
Barang aktivitas pagi orang pi kantor deng sore itu orang pulang kantor. Lalu tambah deng kebijakan baru dari Dinas Perhubungan pemberlakukan sift A deng B sama-sama biking tambah macet ancor.
Su tar bisa ucap akang lae. Orang yang deng oto bisa batahang sampe dua jam tar bagara dar tampa.
Nanaku koran ini, su ampa hari ini macet tamba parah. Biar ada polisi lalulintas yang jaga lae.
Oto penumpang yang mau maso ka dalam terminal lin 3 deng lin 1 saja, akang antre su macang deng ular bagitu. Balong lae deng oto pribadi deng motor yang mau pi atau pulang kantor.
“Ini macet barang sip A deng B dong su mancari sama-sama jadi oto samua tatumpa di jalang jadi macet panjang model ini,” kata Corneles salah satu sopir oto, Rabu 15 Juni 2022.
Dia bilang, waktu dong berlaku giliran ship ada bae sadiki. Waktu itu jalan seng talalu macet. Deng katong dapa penumpang banya.
“Ini penumpang su susah lae katong mancari su porsa,” kata dia bakanor.
Dia jua bilang, waktu berlaku giliran sift itu, dong mancari sante saja. Ada banya waktu lae for lia ana deng bini.
“Berlaku ship bagini nanti macet tarus, oto samua kaluar ka jalang,” cetus dia. (MON)
