RAKYATMALUKU.FAJAR.CO.ID — AMBON, — Oras ini, kalo kaluar ruma deng kendaraan su musti siap surat-surat deng periksa kelengkapan motor atau mobil.
Jang lupa lae, for bawa helm.
Barang Polda Maluku Gelar Operasi Patuh Salawaku. Dong mulai oparasi dor tigabelas sampe duapuluh anam Juni 2022.
Nanaku koran ini, polisi dong jaga di sagala jiku jalan. Ada lae dong jaga di bagian lampu-lampu merah.
Baru dua hari dong jaga, su banyak orang yang dapa tilang tagal seng pake helm, deng saparu motor tar lengkap.
“Kalau bajalang itu biar cuma ka muka MCM saja mar musti bawa helm, polisi ada jaga lae barang,” kata Yasir for dia pung tamang, Selasa 14 Juni 2022.
Yasir bilang tadi pagi, masih jam delapang lae dia su lia orang dapa tahang dari polisi tagal seng ada helm.
Dia mangaku biasa dong ka muka MCM itu seng pake helm lae. Tapi ini jang coba kalau seng mau motor dapa bawa ka kantor polisi
lalu dompet tarobe.
“Kalau mau motor bermalam di kantor polisi noh coba pi bajalang seng pake helem,” tantang Yasir. (MON)
