RAKYATMALUKU.FAJAR.CO.ID — AMBON, — Tiap kali kalo ada kapal dari Tenggara, terutama dari Maluku Barat Daya (MBD) maso Ambon, pasti polisi su suap for sweeping sopi.
Kasiang ee, kalo dapa sopi, polisi dong tumpa akang bagitu saja di dermaga.
Polisi dong seng mau tau, biar cuma dapa satu atau dua botol aqua basar dong tetap tumpa. Padahal bisa jadi itu cuma for oleh-oleh.
Sementara di dalang kota Ambon nih ada sopi yang dong jual bebas. Polisi seng neko akang sadiki lae.
”Beta paleng herang, dalang kota Ambon dong jual sopi kaya ada jual kacang goreng. Jual bebas. Mar tiap kapal maso dar MBD dong sweeping paleng ketat,” kata Memi salah satu mahasiswa asal MBD for Rakyat Maluku, kamareng.
Memi usul musti ada pergerakan sosial dari masyarakat supaya sopi yang orang tatua di kampong biking akang deng susah-susah, mulai dari nae pohon for iris, sampe masa akang seng dapa tumpa dari polisi waktu maso Ambon.
”Kalo sopi yang dong bawa dari MBD for jual bolehlah ditahan, tapi kalo cuma for oleh-oleh, sio kasiang ee, polisi dong jang tumpa akang lae jua,” pinta Memi.
Memi jua harap suapaya dong yang minong sopi seng salah gunakan akang. ” Kalo minom for acara adat bolehlah. Atau for sopu dada sadiki seng apa-apa. Jang minong banya sampe nanti biking kaco. Yang bagitu tuh yang biking sopi dapa larang,” tambah dia. (MON)
