RAKYATMALUKU.FAJAR.CO.ID — AMBON, — Sahari pemerintahan di Kota Ambon kosong saja, sampah su talamburang kiri kanan. Lia saja di terminal oto Tantui. Sampa tatambong dar malam seng ada yang angka, sampe su malam lae. Akang bikin oto macet. Bukang itu saja, sampa jua talamburan sampe ka dalam terminal.Nanaku koran ini, kamareng, banya sampa di tampa oto terminal Tantui, baru akang seng satu tampa akang talamburang kiri kanan.
Jenis sampa jua akang beda-beda, ada sampa plastik deng sampa sisa-sisa makanang.
“Seng tau kanapa sampe sampa talamburang bagini, baru akang bau lai barang campur deng sayor-sayor yang su busu,” kata Laani salah satu warga kota Ambon for koran ini, Senin 23 Mei 2022.
Dia bilang, memang dong jaga buang sampa di sini, tapi itu nanti petugas dong angka akang. Tapi ini dong tar angka akang alhasil lamburan kiri kanan.
“Biasa memang dong buang di situ, tapi petugas sampa dong angka akang. Tapi ini dong tar angka. Mangkali tagal walikota deng wakil walikota su habis masa jabatan kaapa,” ucap Laani.
Laani berharap semoga dong capat angka akang tu sampa tuh jua, supaya sapanggal di terminal ini akang barsih sadiki. (MON)
